ସକାଳର ଭକ୍ତି ଅର୍ଘ୍ୟ

❀꧁❣️ସକାଳର ଭକ୍ତି ଅର୍ଘ୍ୟ❣️꧂❀

♾️♾️♾️♾️⭕⭕♾️♾️♾️♾️

ମିଳିଲା ଯାଇ ନନ୍ଦଦ୍ଵାର। ଦ୍ଵାରୀକି ବୋଲଇ ଉତ୍ତର।
ଗୋପୀଏ ଗଲେ ଅପସରି। ଭିତରେ ପଶିଲା ଅସୁରୀ।

ଯଶୋଦା ଦେଖିଣ ଚକିତ। କାହୁଁ ଅଇଲା ଅଦଭୁତ।
କି ଅବା ତ୍ରିପୁର ସୁନ୍ଦରୀ। ରୂପେ ତ ନାହିଁ ସମସରି।

ପୂତନା ପାଶେଣ ମିଳିଲା। ମଧୁର ବଚନ କହିଲା।
କାହୁଁ ଅଇଲୁ ମହାତ୍ମାଣୀ। କି ଅବା ହରିର ଘରଣୀ।

କିମ୍ପା ମୋ ପୁରକୁ ଅଇଲୁ। ଏ ମୋର ମନକୁ ମୋହିଲୁ।
କିସ କରିବୁ ମୋତେ କହ। ଦେଖି ମୋ ରହୁନାହିଁ ଦେହ।

ପୂତନା ବୋଲଇ ଉତ୍ତର। ଶୁଣ କାମିନୀ ଭାଷା ମୋର।
ମୁଁ ହାଦେ ଦଇବଙ୍କ ନାରୀ। ଜାଣଇ ଭେଦ ମନ୍ତ୍ର କରି।

ମୋହର କ୍ଷୀର କଲେ ପାନ। ପୁତ୍ର ହୋଇବେ ବଳବାନ।
ଯଶୋଦା ହୋଇଲେ ଉଷତ। ପୁତ୍ରେ ମୋ ହେବେ ବଳବନ୍ତ।

ଏ ଯେବେ ମୋର ଘରେ ଥାଇ। ନିରତେ ପୁତ୍ରେ କ୍ଷୀର ଦେଇ।
ବେନିକୁଚକୁ ବେନି ସୁତ। ପିଇଣ ହେବେ ବଳବନ୍ତ।

ସ୍ଵାମୀର ଛାମୁରେ କହିବି। ବହୁତ ଧନ ବସ୍ତ୍ର ଦେବି।
ଯଶୋଦା ଏମନ୍ତ ବିଚାରି। ଘରକୁ ଆଣିଲା ଅସୁରୀ।

( ଅତିବଡ଼ି ଜଗନ୍ନାଥ ଦାସଙ୍କ ବିରଚିତ ଓଡ଼ିଆ ଭାଗବତ , ଦଶମ ସ୍କନ୍ଧ , ସପ୍ତମ ଅଧ୍ୟାୟ )

ପ୍ରସଙ୍ଗ – ପୂତନା ଉଦ୍ଧାର

ଅର୍ଥ – ମହାମୁନି ଶୁକଦେବ କହିଲେ , ହେ ମହାରାଜା ପରୀକ୍ଷିତ ! ଗୋପପୁରରେ କାହାର ନବଜାତ ଶିଶୁ ଅଛି ବୋଲି ପଚାରି ପଚାରି ପୂତନା ନନ୍ଦରାଜାଙ୍କ ଦ୍ଵାରରେ ଯାଇ ପହଞ୍ଚିଲା ଓ ଦ୍ଵାରୀକୁ ସେ ଘରେ ନବଜାତ ଶିଶୁ ଅଛିକି ବୋଲି ପଚାରି ନନ୍ଦରାଜାଙ୍କ ଘର ଅଗଣା ଭିତରକୁ ପ୍ରବେଶ କଲା। ସେଠାରେ ଉପସ୍ଥିତ ଥିବା ଗୋପୀମାନେ ପୂତନା ସମ୍ମୁଖରୁ ଅପସରି ଗଲେ। ପୂତନା ଅସୁରୀ ଯେତେବେଳେ ନନ୍ଦରାଜାଙ୍କ ଘର ଅଗଣା ଭିତରକୁ ପ୍ରବେଶ କଲା ତାର ସୁନ୍ଦର ରୂପକୁ ଦେଖି ଯଶୋଦା ଆଶ୍ଚର୍ଯ୍ୟ ହୋଇଗଲେ ଓ ଭାବିଲେ , ଏଠାକୁ ଏଭଳି ସୁନ୍ଦରୀ ସ୍ତ୍ରୀ ଅକସ୍ମାତ କେଉଁଠାରୁ ଆସିଲା ! ତିନି ଭୁବନରେ ତ ରୂପରେ ଏହା ସହିତ କେହି ସମକକ୍ଷ ହେବେ ନାହିଁ। ମନ ମଧ୍ୟରେ ଏହା ଭାବି ଯଶୋଦା ପୂତନା ନିକଟକୁ ଗଲେ ଓ ତାକୁ ମିଷ୍ଟ ବଚନରେ କହିଲେ , ହେ ମହାତ୍ମାଣୀ ! ତୁମ୍ଭେ ତ ଭଗବାନ ଶ୍ରୀହରିଙ୍କ ଘରଣୀ ମହାଲକ୍ଷ୍ମୀଙ୍କ ଭଳି ଦିଶୁଛ ! ପ୍ରକୃତରେ ତୁମେ କିଏ ଓ କେଉଁଠୁ ଆସିଛ ? ତୁମର ରୂପକୁ ଦେଖି ମୋର ମନ ମୁଗ୍ଧ ହୋଇଗଲା। ତୁମେ ମୋ ଘରକୁ କାହିଁକି ଆସିଛ ? ତୁମେ ଏଠାକୁ ଆସିବାର ଅଭିପ୍ରାୟ ମୋତେ ଶୀଘ୍ର କୁହ। ସେକଥା ନ ଜାଣିବା ପର୍ଯ୍ୟନ୍ତ ମୁଁ ଆଉ ଥୟ ଧରି ରହି ପାରୁନାହିଁ। ଯଶୋଦାଙ୍କ ଠାରୁ ଏହି କଥା ଶୁଣି ପୂତନା କହିଲା , ତୁମ ଭାଗ୍ୟ ବଳରୁ ଦଇବ ମୋତେ ଏଠିକି ପଠାଇଛି। ମୋତେ ଏପରି ମନ୍ତ୍ର ଜଣାଅଛି ଯାହା ଦ୍ଵାରା କି ମୋର କ୍ଷୀର ପାନ କଲେ ତୁମ୍ଭର ପୁତ୍ରମାନେ ବଳବାନ ହେବେ। ପୂତନା ଅସୁରୀ ମୁଖରୁ ଏହିକଥା ଶୁଣି ନନ୍ଦରାଣୀ ଯଶୋଦା ମନ ମଧ୍ୟରେ ଆନନ୍ଦିତ ହୋଇ ବିଚାର କଲେ , ଏହାର କ୍ଷୀର ପାନ କଲେ ମୋର ପୁତ୍ରମାନେ ନିଶ୍ଚିତ ଭାବରେ ବଳବାନ ହେବେ। ଏହି ସୁନ୍ଦରୀ ସ୍ତ୍ରୀ ଯେବେ ମୋ ଘରେ ରହନ୍ତା ତାହେଲେ ସବୁଦିନେ ଇୟେ ମୋ ପୁତ୍ରମାନଙ୍କୁ କ୍ଷୀର ପିଆନ୍ତା। ଏହାର ବେନି ସ୍ତନରୁ କ୍ଷୀର ପାନ କରି ମୋର ଦୁଇ ପୁତ୍ର ବଳବାନ ହୁଅନ୍ତେ। ତେଣୁ ମୁଁ ଏକଥା ସ୍ଵାମୀଙ୍କ ଆଗରେ କହିବି ଓ ବହୁତ ଧନ ଓ ବସ୍ତ୍ର ଦେଇ ଏହାକୁ ମୋ ଘରେ ରଖିବାର ବ୍ୟବସ୍ଥା କରିବି। ମନ ମଧ୍ୟରେ ଏହିକଥା ବିଚାର କରି ଯଶୋଦା ପୂତନା ଅସୁରୀକୁ ନିଜ ଘର ଭିତରକୁ ଡାକି ନେଲେ।

ଭାବାର୍ଥ – ପୂତନା ଠାରୁ କ୍ଷୀର ପାନ କଲେ ପୁତ୍ରମାନେ ବଳବାନ ହେବେ ବୋଲି ଭାବି ଯଶୋଦା ପୂତନା ଅସୁରୀକୁ ନିଜ ଘର ଭିତରକୁ ଡ଼ାକି ନେଲେ।

ଉପସ୍ଥାପନା – ଗୁରୁ ଚରଣାଶ୍ରିତ ବିଶ୍ଵନାଥ ନାୟକ
୧୮୪୪

✿❁❣️༒ ଜୟ ଜଗନ୍ନାଥ ༒❣️❁✿