ଅଭିଶପ୍ତ ଦ୍ୱାରପାଳ, ଦ୍ଵିତୀୟ ଅଧ୍ୟାୟ

ଆସନ୍ତୁ ପଢିବା ଆଜିର ପୌରାଣିକ କାହାଣୀ

ଅଭିଶପ୍ତ ଦ୍ୱାରପାଳ, ଦ୍ଵିତୀୟ ଅଧ୍ୟାୟ

!! ଭାଗ – ୨୨୬ !!

ଡା.କୃପାସିନ୍ଧୁ ମିଶ୍ର
✤●○●○●○✤‼️✤○●○●○●✤
ସୌଜନ୍ୟ: ଆଧ୍ୟାତ୍ମ ଜଗତ ହ୍ବାଟ୍ସଆପ୍ ଗୃପ୍

ମହୀରାବଣର ଯୋଜନା ଶୁଣି ଲଙ୍କାଧୀଶ ଅତ୍ୟନ୍ତ ଆନନ୍ଦିତ ହେଲେ Ι ଶ୍ରୀରାମ ଲକ୍ଷ୍ମଣଙ୍କୁ ଅପହରଣ କରିନେଇ ପାତାଳରେ ସେ ପୂଜା କରୁଥିବା କାଳୀ ମୂର୍ତ୍ତିଙ୍କ ସମ୍ମୁଖରେ ବଳି ଦେଇଦେବ ବୋଲି ଦୃଢ ବିଶ୍ୱାସର ସହ କହୁଥିଲା Ι କକ୍ଷ ବାହାରେ ଦାସୀଟିଏ ଗୃହସଜ୍ଜା କାର୍ଯ୍ୟରେ ବ୍ୟସ୍ତ ଥିଲେ ମଧ୍ୟ ଏମାନଙ୍କ ଆଲୋଚନା ଶ୍ରବଣ କରୁଥିଲା ବୋଲି ସେ ଦୁହେଁ ଜାଣି ପାରିଲେ ନାହିଁ Ι ସେହି ଦାସୀ ତ୍ରିଜଟାଙ୍କ ପାଇଁ ଗୁପ୍ତଚର ବୃତ୍ତି କରୁଥିଲା Ι ଏହି ମୂଲ୍ୟବାନ ସମ୍ବାଦଟି ଅବିଳମ୍ବେ ତ୍ରିଜଟାଙ୍କୁ ଓ ତାଙ୍କ ଠାରୁ ଶ୍ରୀରାମଙ୍କ ଶିବିରକୁ ସଞ୍ଚାରିତ ହୋଇଗଲା Ι ଏଥର ଯୋଜନା ଆରମ୍ଭ ହେଲା ସୁବଳୟା ପାଦଦେଶରେ Ι ଏତେବଡ ମାୟାବୀର ଚକ୍ରାନ୍ତଙ୍କୁ ପଣ୍ଡ କରିବା ପାଇଁ ସାମାନ୍ୟ କିଛି ଅନୁଭୂତି ଥିଲା ବିଭୀଷଣଙ୍କର Ι ତେଣୁ ତାଙ୍କୁ ବ୍ୟୁହରଚନାର ମୂଖ୍ୟ ଦାୟିତ୍ୱ ଦିଆଗଲା Ι

ପ୍ରତ୍ୟେକ ଦିଗ, ପ୍ରତ୍ୟେକ କୋଣ ତଥା ଆକାଶ ମାର୍ଗ ଉପରେ ଦୃଷ୍ଟି ରଖି ସତର୍କ ରହିଲେ ଜାମ୍ବବାନ, ସୁଗ୍ରୀବ, ଅଙ୍ଗଦ, ନଳ ନୀଳ, ମଇନ୍ଦ ଦ୍ୱିବିନ୍ଦ,ଗଜ, ଗବୟ ଗବାକ୍ଷ ଆଦି ବୀର ସେନାପତିମାନେ Ι ଶିବିର ସଂରକ୍ଷଣ ସଂରଚନା ପରେ ମଧ୍ୟ ବିଭୀଷଣ ସନ୍ତୁଷ୍ଟ ହେଲେ ନାହିଁ Ι ସେ ହନୁମାନଙ୍କ ପରାମର୍ଶ ଲୋଡିଲେ Ι ହନୁମାନ କହିଲେ,” ମୁଁ ମୋ ଲାଞ୍ଚକୁ ଗୁଡ଼ାଇ ଗୁଡ଼ାଇ ଗୋଟିଏ ଦୁର୍ଗ ତିଆରି କରି ଦେଇ ପାରିବି Ι ସେହି ଦୁର୍ଗ ମଧ୍ୟରେ ପ୍ରଭୁ ଶ୍ରୀରାମ ଅନୁଜ ଲକ୍ଷ୍ମଣଙ୍କ ସହ ଅବସ୍ଥାନ କରିବେ Ι ସେହି ଲାଙ୍ଗୁଳ ନିର୍ମିତ ଗଡ଼ରେ ଗୋଟିଏ ଦ୍ୱାର ରହିବ ଏବଂ ସେ ଦ୍ୱାରକୁ ମୁଁ ନିଜେ ଜଗି ରହିବି Ι ବାୟୁ ଚଳାଚଳ ପାଇଁ ଉନ୍ମୁକ୍ତ ରହିବ ଉର୍ଦ୍ଧ୍ୱରେ ଏକ ଗବାକ୍ଷ Ι ପ୍ରଭୁ ସେହି ଗବାକ୍ଷକୁ ଶର ଜାଲରେ ଅବରୁଦ୍ଧ କରିଦେବେ Ι ଯୋଜନା ଶୀଘ୍ର କାର୍ଯ୍ୟାନ୍ୱିତ ହେଲା Ι ବିଭୀଷଣ କହିଲେ,”ହନୁମାନ, ତୁମେ ନିଜର ଦାୟିତ୍ୱ ବିଷୟରେ ସଚେତନ ତ ? ହନୁମାନ କହିଲେ,”ନିଶ୍ଚୟ Ι ମହୀରାବଣ ଆଜି ନିଶ୍ଚୟ ଧରା ପଡିବ Ι ଆଜି ମୋ ହସ୍ତରୁ ତାର ନିସ୍ତାର ନାହିଁ Ι” ବିଭୀଷଣ ହସିଲେ Ι କହିଲେ, “ତୁମେ କଣ ମହୀରାବଣକୁ ଚିହ୍ନିଛ ମାରୁତି ? ତାକୁ ଧରିବ କେମିତି ?” ହନୁମାନ କିଞ୍ଚିତ୍ ଲଜ୍ଜିତ ହେଲେ Ι ବିଭୀଷଣ କହିଲେ, “ତୁମେ ଚିହ୍ନିଥିଲେ ବି କଣ ହୋଇଥାନ୍ତା ପାବନି ? ସେ କଣ ନିଜ ରୂପରେ ଦେଖାଦେବ ଯେ ତୁମେ ତାକୁ ଧରିବ ? ସେ ଯେ କୌଣସି ରୂପ ଧାରଣ କରି ଆସିପାରେ Ι

“ମୋତେ ନ ପଚାରି ଦ୍ୱାର ନ ଛାଡିବ କେବେ, ତୁମ୍ଭ ପିତା ପ୍ରଭଞ୍ଜନ ଆସନ୍ତିଟି ଯେବେ Ι
ଏହା କହି ବିଭୀଷଣ ପୂର୍ବ ଦିଗେ ଗଲା, ଦ୍ଵିତୀୟ ପ୍ରହର ନିଶି ପ୍ରବେଶ ହୋଇଲା Ι
ମହୀରାବଣ ନବରୁଁ ହୋଇଲା ବାହାର, ପ୍ରବେଶ ହୋଇଲା ଯହିଁ କପିଙ୍କ ଶିବିର Ι[କ୍ଷେତ୍ରମୋହନ]

ପ୍ରତ୍ୟେକ ଦିଗରେ ସତର୍କ ପ୍ରହରୀ Ι ସଶରୀରେ ପ୍ରବେଶ କରିବା ଅସମ୍ଭବ Ι ସେ ଏକ ବାନର ରୂପ ଧରି ବୁଲି ବୁଲି ମୂଖ୍ୟ ବାନର ସେନାପତିମାନଙ୍କ ରୂପକୁ ନିରୀକ୍ଷଣ କଲା Ι ତା ପରେ ସେ ଲାଞ୍ଜରେ ନିର୍ମିତ ଗଡ଼ ନିକଟରେ ପହଞ୍ଚିଲା Ι ଗଡର ଦ୍ୱାର ଖୋଜି ଖୋଜି ବୁଲିଲା Ι ଦେଖିଲା, ଗୋଟିଏ ସ୍ଥାନରେ ଦ୍ୱାରଟିଏ ଅଛି, ମାତ୍ର ସେଠାରେ ଜଗିବସିଛି ହନୁମାନ Ι ସଙ୍ଗେ ସଙ୍ଗେ ସେ ଅଙ୍ଗଦର ରୂପ ଧାରଣ କଲା Ι ହନୁମାନଙ୍କ ନିକଟକୁ ଯାଇ ଭିତରକୁ ଯିବାପାଇଁ ଅନୁମତି ମାଗିଲା Ι ହନୁମାନ କହିଲେ,” ଅପେକ୍ଷା କର Ι ବିଭୀଷଣ ଆସିଲେ, ଛାଡ଼ିଦେବି Ι” ଅଙ୍ଗଦକହିଲା, “ମୁଁ ଆସୁଛି Ι” ହନୁମାନ ଦେଖୁଁ ଦେଖୁଁ ଅଙ୍ଗଦ ଅନ୍ତର୍ହିତ ହୋଇଗଲା Ι ବିଭୀଷଣ ଆସିବାରୁ ହନୁମାନ କହିଲେ, “ଏବେ ଅଙ୍ଗଦ ଆସି ଭିତରକୁ ଯିବାକୁ କହୁଥିଲା Ι ମୁଁ ଆପଣଙ୍କ ଆସିବା ଯାଏଁ ଅପେକ୍ଷା କରିବାକୁ କହିଲାରୁ ଚାଲିଗଲା Ι” ବିଭୀଷଣ କହିଲେ, “ଅଙ୍ଗଦ ପୂର୍ବଦ୍ୱାର ଜଗିଥିବାର ମୁଁ ଏବେ ଦେଖି ଆସିଲି Ι ତା ଅର୍ଥ, ମହୀରାବଣ ଶିବିର ମଧ୍ୟରେ ପ୍ରବେଶ କରି ସାରିଛି ହନୁମାନ, ସାବଧାନ !” ବିଭୀଷଣ ମହୀରାବଣର ଅନୁସନ୍ଧାନ କରିବାକୁ ଯିବା ଅବସରରେ ନଳ ଆସିଲା, ଗଲା Ι ନୀଳ ଆସିଲା Ι ସେ ମଧ୍ୟ ନିରାଶ ହୋଇ ଗଲା Ι ହନୁମାନ କାହାରିକୁ ବିଭୀଷଣଙ୍କ ବିନା ପ୍ରତ୍ୟକ୍ଷ ଅନୁମତିରେ ଛାଡୁ ନ ଥାନ୍ତି Ι ବିଭୀଷଣ ଆସିଲେ Ι କହିଲେ,” ମୋତେ ଛାଡ ମାରୁତି, ମୁଁ ଦୁଇଟି ମନ୍ତ୍ର ସିଦ୍ଧ କବଚ ଆଣିଛି Ι ପ୍ରଭୁ ଦୁହିଁଙ୍କ ହସ୍ତରେ ବାନ୍ଧି ଦେଇ ଆସେଁ Ι ତା ହେଲେ ମହୀରାବଣର ମାୟା ତାଙ୍କୁ ପ୍ରଭାବିତ କରି ପାରିବ ନାହିଁ Ι” ହନୁମାନ ଛାଡିଦେଲେ Ι ଭିତରକୁ ପ୍ରବେଶ କରିଗଲା ବିଭୀଷଣ ରୂପୀ ମହୀରାବଣ Ι ମନ୍ତ୍ର ଧୂଳି ଫିଙ୍ଗି ଦେବାରୁ ରାମ ଲକ୍ଷ୍ମଣ ଦେଖୁଁ ଦେଖୁଁ ମୂର୍ଚ୍ଛିତ ହୋଇପଡିଲେ Ι ଦ୍ୱାର ଦେଇ ବାହାରକୁ ଆସିବା ନିରାପଦ ନ ଥିଲା Ι ସେ ମନ୍ତ୍ରବଳରେ ସେହି ଲାଞ୍ଜ ନିର୍ମିତ ଦୁର୍ଗ ମଧ୍ୟରେ ପାତାଳକୁ ଯିବାପାଇଁ ସୁଡ଼ଙ୍ଗଟିଏ ସୃଷ୍ଟି କଲା Ι ମୂର୍ଚ୍ଛିତ ଦୁଇ ଭ୍ରାତାଙ୍କୁ କାନ୍ଧରେ ପକାଇ ସେହି ସୁଡ଼ଙ୍ଗ ଦେଇ ଅବଲୀଳାକ୍ରମେ ଓହ୍ଳାଇଗଲା ପାତାଳକୁ Ι

କିଛି ସମୟ ମଧ୍ୟରେ ପ୍ରକୃତ ବିଭୀଷଣ ଆସିଲେ Ι ‘ଭିତରେ ସବୁ ଠିକ ଅଛି କି’ ବୋଲି ପ୍ରଶ୍ନ କଲେ Ι ହନୁମାନ କହିଲେ, “ଏହିଥର ଧରା ପଡ଼ିଛୁ ରେ ପାମର ମହୀରାବଣ Ι ବିଭୀଷଣ ତ ଭିତରେ ଅଛନ୍ତି Ι ତୁ ପୁଣି କେଉଁଠୁ ଗୋଟାଏ ବିଭୀଷଣ ହୋଇ ଆସିଲୁ ?” ବିଭୀଷଣ ଯେତେ ନିୟମ କଲେ ମଧ୍ୟ ମାରୁତି ମାନିବାକୁ ପ୍ରସ୍ତୁତ ନ ଥିଲେ Ι ସେ ବିଭୀଷଣଙ୍କୁ ନିଜର ବଳିଷ୍ଠ ବାହୁବେଷ୍ଟନୀ ମଧ୍ୟରେ ଧରି ରଖିଥିଲେ Ι ବିଭୀଷଣ କହିଲେ,” ସରିଗଲା ହନୁମାନ, ସବୁ ସରିଗଲା Ι ମହୀରାବଣ ମୋ ରୂପରେ ଆସି ଭିତରେ ପ୍ରବେଶ କରିଯାଇଛି Ι ସେ ଶ୍ରୀରାମ ଓ ଲକ୍ଷ୍ମଣଙ୍କୁ ନେଇ ଯାଇ ସାରିବଣି Ι” ହନୁମାନଙ୍କର ମଧ୍ୟ ସନ୍ଦେହ ହେଲା Ι ଉଭୟ ଗଡ଼ ମଧ୍ୟରେ ପ୍ରବେଶ କଲେ Ι ଅନ୍ୟ ବାନରମାନେ ମଧ୍ୟ ହନୁମାନ ଓ ବିଭୀଷଣଙ୍କ ମଧ୍ୟରେ କଳହ ଶୁଣି ଆସିଯାଇଥିଲେ Ι ଲାଞ୍ଜ ନିର୍ମିତ ସେହି ସୁରକ୍ଷିତ ଦୁର୍ଗ ମଧ୍ୟରେ ଶ୍ରୀରାମ ଓ ଲକ୍ଷ୍ମଣ ମିଳିଲେ ନାହିଁ Ι ସେମାନଙ୍କୁ ଉପହାସ କରୁଥିଲା ଏକ ଅନ୍ଧକାରାଚ୍ଛନ୍ନ ଗଭୀର ଗହ୍ୱର Ι

[କ୍ରମଶଃ]

✿❁❣️༒ ଜୟ ଶ୍ରୀ ରାମ༒ ❣️❁✿

=≠≠=====ଆଜି ପାଇଁ ସମାପ୍ତ==≠====
🏵️🏵️🙏 ଶୁଭ ରାତ୍ରି 🙏🏵️🏵️